Xalqchil davlat xizmatiga ochiq yo'l

Oʼzbekiston Respublikasi Prezidentining 2019 yil 3 oktyabrdagi “Oʼzbekiston Respublikasida kadrlar siyosati va davlat fuqarolik xizmati tizimini tubdan takomillashtirish chora-tadbirlari toʼgʼrisida”gi PF-5843-son Farmonida belgilangan vazifalar ijrosini taʼminlash hamda davlat organlari va tashkilotlarida fuqarolarni ishga qabul qilishda ochiq mustaqil tanlov asosida amalga oshirilishini yoshlarga keng targʼibot qilish, eng istiqbolli kadrlarni davlat fuqarolik xizmatiga ochiq mustaqil tanlov asosida qabul qilishni tashkillashtirish maqsadida yoshlar bilan ochiq muloqotlar tashkil etib kelinmoqda.

Navbatdagi ochiq muloqot Oʼzbekiston Respublikasi Prezidenti huzuridagi Davlat xizmatini rivojlantirish agentligi Buxoro viloyati filiali tomonidan joriy yilning 15-aprel kuni Buxoro davlat universiteti katta majlislar zalida bitiruvchi talabalar bilan "Xalqchil davlat xizmatiga ochiq yo'l" mavzusida ochiq muloqot oʼtkazildi. Ochiq muloqotda Buxoro viloyati oliy taʼlim muassasalari shuning bilan bir qatorda Buxoro davlat universiteti Agronomiya va biotexnologiya fakulteti, Maktabgacha taʼlim va Axborot texnologiyalari fakulteti bitiruvchi kurs talabalari ham ishtirok etishdi.

 

Ochiq muloqot davomida 300 nafarga yaqin ishtirokchi yoshlarga davlat fuqarolik xizmati tushunchasi, nomzodlarni ochiq mustaqil tanlov orqali saralab olish jarayonlari, shu jumladan davlat fuqarolik xizmatchilari vakant lavozimlarining yagona ochiq portali – vacancy.argos.uz platformasidan roʼyxatdan oʼtish, platformadagi mavjud vakant lavozimlarga hujjat topshirish tartiblari, davlat fuqarolik xizmatiga kirishda barcha fuqarolarning teng imkoniyatlardan foydalanishi hamda davlat fuqarolik xizmatida nomzodlarni saralab olishning shaffof mexanizmlari toʼgʼrisida batafsil tushuntirish berildi.

Bundan tashqari, muloqot davomida vacancy.argos.uz platformasidan roʼyxatdan oʼtish, mavjud vakant lavozimlarga hujjat topshirish tartiblari yoshlarning bevosita ishtirokida amaliy misollar orqali koʼrsatib berildi.

Uchrashuv jonli muloqot shaklida davom etib, yoshlarning mavzu yuzasidan savolllariga Davlat xizmatini rivojlantirish agentligi Buxoro viloyati filiali masʼul xodimlari tomonidan batafsil tushuntirishlar berildi.

 

 BuxDU Bandlik markazi matbuot xizmati: