Buxoro davlat universitetida viloyatimizning yirik tadbirkor ayollari bilan uchrashuv bo`lib o`tdi

 

Mamlakatimizda yoshlar muammolariga, xususan, ularning ish bilan bandligiga katta e’tibor berilmoqda. Bu vazifani bajarishda barcha oliy ta’lim muassasalari mehnat bozoriga birinchi marta kirib borayotgan yoshlarni ishga joylashtirish masalasini ustuvor vazifalardan biri sifatida qayd etganlar.

HR, Marketing, Iqtisodchi, Dasturchi, Issiqxonachilik, Lobarantlik mutaxassisliklari bo'yicha ishga qabul qilish, bitiruvchilarga keng imkoniyat yaratib berish, o`zi istagan yo'nalish bo'yicha chet elda o'qitib, ish bilan ta'minlash maqsadini ko`zlab o`tkazilgan bugungi uchrashuv yoshlar bandligini ta’minlash yo`lidagi amaliy ishlarning davomi bo`ldi.

BuxDU Bandlik markazi hamda Agronomiya va biotexnologiya fakulteti tashabbusi bilan universitet talabalari bandligini ta'minlash va korxona xodimlari safini universitet yoshlari bilan kengaytirish maqsadida viloyatimiz yirik tadbirkor ayollari bilan bo`lib o`tgan uchrashuvda “Tadbirkor ayol” O’zbekiston ishbilarmon ayollar uyushmasi Buxoro viloyat hududiy boʻlimi raisi Axmedova Dilbar Boʻronovna, “BANOAZ TEKSTIL” MCHJ direktori Adilova Matob Djabarovna, “Fayz qurilish mollari” MCHJ direktori Dilorom Fayziyeva, Agronomiya va biotexnologiya fakulteti dekani Xafiza Artikovalar talabalar bilan o`z tajribalarini o`rtoqlashdilar. 

Ochiq va erkin muloqot tarzida o`tgan uchrashuvda BuxDUning Agronomiya va biotexnologiya, Tarix va madaniy meros, Iqtisodiyot va turizm, Axborot texnologiyalari fakultetlari talabalari ishtirok etishdi.

Uchrashuvni BuxDU rektori Obidjon Xamidov ochib berdi. Talabalarga mehmonlarni tanishtirish asnosida bitiruvchilar bandligini ta’minlash uchun qanday bo`sh ish o`rinlari mavjudligi xususida ularga yuzlandi.

Muloqot davomida ma’lum bo`ldiki, talabalarni asosan bugungi kunda eng dolzarb bo`lgan IT, Agronomiya sohalaridagi bo`sh ish o`rinlari ko`proq qiziqtirar ekan. Qolaversa, viloyatimizda hali unchalik ommalashmagan soha HR yo`nalishi xususida savollar yo`llashdi: 

 

Men HR yo`nalishiga qiziqaman. Bu borada o`z ustimda ishlashim va mutaxassis bo`lishim uchun nima qilishim kerak?

Shaxnozaxon

Iqtisodiyot va Turizm fakulteti talabasi

 

O`rinli savol uchun tashakkur. Ayni kunlarda Toshkent shahrida rivoj topayotgan HR yo'nalishi korxona va tashkilotlarda ayollar va tashkilot direktorlari o'rtasidagi muammolarni hal qiluvchi, ayollarimizga qanday shart-sharoit, qulay muhit kerakligi, yashash sharoiti yaxshi yoki yomon ekanligini oldindan bilib, kuzatib, bevosita tashkilot direktorlari bilan hal qiluvchi o'rtadagi vositachi inson – HRchilarga ehtiyoj mavjud. Hatto bo'sh ish o'rinlari ham yetarlicha topiladi. Shu yo'nalishda o'qishni va ishlashni istasangiz malakaviy xodimlar bilan o'zaro shartnoma tuzib, masofaviy o'qitish va imkoniyat yaratib berish mumkin.

Dilorom Fayziyeva,

 “Fayz qurilish mollari” MCHJ direktori

 

Bitiruvchi bosqich talabasiman. Uyda kichkinagina tikuv sexim mavjud, bu sexda asosan erkaklar kiyimlarini tikib, bozor rastalarida sotamiz. Tadbirkorlik faoliyatimni kengaytirish uchun qanday maslahat va ko'mak bera olasiz?

Sitorabonu,

Turizm yo`nalishi talabasi

 

Tadbirkorlikni boshlaganingiz juda quvonarli. Ammo bozor iqtisodiyotida, qolaversa, marketingda 3ta o`zingiz javob beradigan savol bor. Ya’ni tadbirkorning o'ziga qo'yiladigan 3 ta konstruksiyasi bo'lishi kerak. Tadbirkor uchun mablag' masalasi bu eng so'nggi o`rinda turishi lozim. Asosiy e’tibor bozor talabi nima, uni qay shaklda ishlab chiqarish va kim uchun ishlab chiqarishdan iborat. Mana shu savolga aniq javob va yechim bo'lsa, tadbirkor xohlagan joyida o'z faoliyatini gullatib, yashnatadi. Siz bizning o'quv kurslarimizga keling, yanada yaxshiroq rivojlantirib, sertifikat beramiz va orzuyingizdagi ishga yo`naltiramiz. Yoki tadbirkorligingizni yanada kengaytirib, imtiyozli hamda betalofot kredit olishingizga ko'maklashamiz .

Axmedova Dilbar Boʻronovna

“Tadbirkor ayol” O’zbekiston ishbilarmon ayollar uyushmasi Buxoro viloyat hududiy boʻlimi raisi

 

Men Tuproqshunoslik yo'nalishida tahsil olaman. O'qishdan tashqari, IT dizaynerlik yo'nalishini mukammal o'rganganman. Yangi qurilayotgan mehmonxonalaringiz dizaynini chizishda yoki shunga o'xshash korxonalar dizayni bilan bog`liq ishlarda ishlash istagim bor. Bu borada qanday amaliy yordam ko'rsata olasiz?

Shahzodjon,

Agronomiya va biotexnologiyalar fakulteti 4-bosqich talabasi

 

Yangi qurilayotgan mehmonxonamiz “Buxoro city”da qurilayotganligi sababli biz Turkiya bilan hamkorlikda ish olib bormoqdamiz. Shu sababli binolar dizayni bilan maxsus dizaynerlarimiz ishlamoqda. Sizda xohish bo'lsa, shu yo'nalishingiz bo'yicha qayta o'qitib, mukammal tayyorlatib, ish bilan ta'minlaymiz.

Dilorom Fayziyeva

“Fayz qurilish mollari” MCHJ direktori

Uchrashuv mobaynida talabalar o`zlarini qiziqtirgan barcha savollarga javob oldilar. So'ngida tomonlarning kelishuvi asosida universitet hamda tashkilotlar bilan memorandum imzolandi.